Si Kristo magbag-o sa Kultura

Nagpadayon karon ang Parish Formation Team sa paghimo sa Duaw-Sangyaw sa mga kapilya nga gisugdan didto sa kapilya sa Tubod Diyot, Barangay Calajoa-an niadtong Pebrero 1, 2010, Isip pasiunang kalihokan pagpangandam sa Semana Santa karong tuiga.
Gitakda nga matapos kini sa dili pa moabot ang Domingo sa Lukay. Matud ni sister Christine Lopez, pastoral worker sa parokya, nga ang Duaw –Sangyaw usa ka buluhaton nga himuon sa atong parokya makatulo sa usa ka tuig.
Buhaton kini panahon magsingabot ang Piyesta sa tibuok Parokya, kanus-a ang imahen sa Putli nga Kasingkasing ni Maria ihatod pagduaw ngadto sa mga nagkalainlaing kapilya matag adlaw ug himuon usab kini panahon sa Pasko sa Pagkatawo ni Hesus kanus-a ang imahen Niya sa pagkabata mao na usab ang ihatod sa pagduaw.
Karong panahon sa kwaresma, ang imahen ni Hesus Nazareno mao na usab ang dad-on ngadto sa mga kapilya nga hingtungdan sa sama gihapong kalihokan.
Atol niini matag gabii, adunay pakigpulong nga himuon ang mga sakop sa Formation Team nga pinangulohan ni Fr. Oscar Ornopia, ang tigdumalang pari sa Parish Pastoral Program, ug tapuson kini diha sa pagsaulog sa Santos nga Misa.Ang gipunting karon nga hisgotanan mao ang Archdiocesan Pastoral Thrust karong tuig 2010, nga mao ang “Evangelization of Culture, ug ang tema sa pagsaulog sa 75th anniversary sa Archdiocese of Cebu: Becoming witnesses of hope , reconciliation and peace for our world in our time”.
Subay niini, batbaton sa mga mamumulong ang mosunod nga mga topics: Kinsa si kristo?; Unsa ang kultura?; Ang relasyon tali ni Kristo ug kultura; Mga baruganan sa Simbahan kabahin sa kultura; Media ug kultura ug Ang Pag-amping sa kalikopan.
Dugang niini, adunay mga paghisgot-hisgot mahitungod sa politikanhong kahimtang sa katilingban sa panahon karon , ug lakip na niini ang pagtuki sa mga taras ug kinaiya sa kandidato nga angayan ibutang sa katungdanan sa pangagamhanan
Ang Knights of Columbus, pinaagi ni Bro. Jurek Bargayo nag-abag usab sa Duaw-Sangyaw pinaagi sa pagtudlo sa bag-ong pamaagi sa pagbotar ginamit ang Automated Voting Machine nga maoy gamiton karong eleksyon.
Ang mga sakop sa Formation Team sa ilang mga pagpamulong sa mga kapilya nagkanayon nga angayan lang nga ibutang nato si Kristo sa tunga-tunga sa tanan natong mga kalihokan tungod kay: “si Kristo magbag-o sa kultura”. Kasamtangan karong nag-uban sa pundok nga naglangkob sa Formation Team mao sila si Myrna Dellosa, Christine Lopez, Octavia Sellon, Sr. Babie Larosa, Alan Caña, Ramonito Mañacap, Geef Secuya, Anthony Calinawan, Jurek Bargayo, Rafael Cabalquinto ug Stephanie Lascuña.